लौ, फेरि पानी पर्यो (कविता)

कुशल सापकोटा ‘राग‘

लौ, फेरि पानी पर्यो—
र सबै मान्छे हतारिन थाले,
छाता खोल्दै, गन्तव्यतिर दौडिँदै,
कोही काममा ढिलो हुन्छन् भनेर,
कोही आफ्नै सोचभित्र गुम्सिँदै।

सडक बगिरहेको छ,
पानीसँगै मान्छेका पाइला पनि।
छप्किएर उडेका थोपा
कसैका कपडामा टाँसिन्छन्,
कसैका सपना चिसो पार्छन्।

बादल बोल्दैन,
तर गर्जन सुनिन्छ
जसरी भीड बोल्दैन,
तर हतारले सबथोक बताउँछ।

त्यही भीडको छेउ उभिएर
म हेर्छु
सबैजना आफ्नो बाटोमा लागेका छन्,
कसैसँग कुरा गर्ने समय छैन,
कसैसँग भिज्ने चाहना पनि छैन।

शहर झन गम्भीर लाग्छ
जब झरीले सबै कुरा ढाकिदिन्छ।
त्यो ओसिलो हावा,
चिसो छाती,
अनि भीडभित्रको एकान्त
सबै थिचिन्छन्,
तर कसैले केही भन्दैनन्।

लौ, फेरि पानी पर्यो
तर आज यो वर्षा
सिर्फ मौसमको मात्र होइन,
यो एक मौनताको कथा हो
जहाँ सबैजना हिँडिरहेका छन्,
तर कोही रोकिँदैनन्

थप समाचारहरु:

यस्तो छ बालेनको स्वर रहेको ‘लाज शरणम्’को गीत नेपाल टेलिकमको ब्रान्ड एम्बेसडरमा अभिनेत्री खड्का नियुक्त काठमाण्डौमा घन्कियो वरिष्ठ कवि तथा साहित्यकार तीर्थ श्रेष्ठका एकल कविता वाचन ‘हेल्लो काँशीराम’ को प्रमोशनका लागि दीलिप रायमाझी नेपाल आउने मेनुका राईको स्वरमा ‘हेलो हाई नमस्कार’ सार्वजनिक ‘हेल्लो काँशीराम’को टिजर सार्वजनिक