बढ्दो आर्थिक अपराध : बैंकिङ कसुरका मुद्धा सबैभन्दा बढी

बिजनेस पोष्ट

५ महिना अगाडि

काठमाडौँ २८ श्रावण २०८२

जिल्ला प्रहरी परिसर काठमाडौंले आर्थिक अपराधका घटनाहरूमा उल्लेखनीय वृद्धि भएको जनाएको छ। आर्थिक वर्ष २०८१/०८२ मा सबैभन्दा बढी मुद्दा बैंकिङ कसुरसँग सम्बन्धित दर्ता भएको प्रहरीले बताएको छ। प्रहरी वरिष्ठ उपरीक्षक (एसएसपी) विश्व अधिकारीका अनुसार, उक्त वर्षमा कुल १२,९१५ मुद्दा दर्ता भएका थिए, जसमध्ये बैंकिङ कसुरका मुद्दाहरूले सबैभन्दा ठूलो हिस्सा ओगटेका छन्।

बुधवार आयोजित पत्रकार सम्मेलनमा एसएसपी अधिकारीले बैंकिङ कसुरका ६,५५३ मुद्दा दर्ता भएको जानकारी दिए। यी मुद्दाहरूमा चेक बाउन्स, ऋण तिर्न नसक्ने लगायतका कसुरहरू समावेश छन्। बैंकिङ कसुरपछि अभद्र व्यवहारका १,९५३ मुद्दा दोस्रो स्थानमा रहेका छन्। त्यसपछि क्रमशः चोरी (९५१), ठगी (७४७), लागुऔषध (४३१), आत्महत्या (३३२), जबरजस्ती करणी (२४४), ज्यान मार्ने उद्योग (१४०), सवारी ज्यान (१००) र सवारी अंगभंग (७४) मुद्दा दर्ता भएको उनले बताए।

“सबैभन्दा बढी दर्ता भएका १० प्रकारका अपराधहरूको विश्लेषण गर्दा बैंकिङ कसुर पहिलो स्थानमा छ, जसमा ६,५५३ मुद्दा छन्,” एसएसपी अधिकारीले भने। “यी १० प्रकारका अपराधले कुल मुद्दाको ८९ प्रतिशत हिस्सा ओगटेका छन्।” औसतमा दैनिक ३५ वटा मुद्दा दर्ता भएको उनले बताए।

एसएसपी अधिकारीले काठमाडौं जिल्लामा प्रहरी जनशक्तिको अभाव रहेको पनि उल्लेख गरे। कुल ४,०१६ स्वीकृत दरबन्दी भए पनि हाल ३,२३३ जना मात्र कार्यरत छन्, जसले ८१५ जनाको कमी देखाउँछ। “यो जनशक्ति अभावले कानुन कार्यान्वयनमा चुनौती थपिएको छ,” उनले भने।

गत आर्थिक वर्षमा जिल्ला प्रहरी परिसर काठमाडौंले फैसला कार्यान्वयनमार्फत ५,५१२ व्यक्तिबाट २४ करोड २० लाख ९४ हजार ८५९ रुपैयाँ जरिवाना असुल गरेको छ। यस्तै, ६ करोड ८५ लाख ५० हजार १०६ रुपैयाँ बराबरको हुण्डी रकम बरामद गरिएको छ। साथै, कार्यालयले १२ करोड ७५ लाख ८ हजार ८२८ रुपैयाँ राजस्व दाखिला गरेको छ।

आर्थिक अपराध, विशेषगरी बैंकिङ कसुरको वृद्धिले काठमाडौंमा अपराध नियन्त्रणका लागि थप स्रोतसाधन र प्रभावकारी उपायहरूको आवश्यकता औंल्याएको छ।