आईएमई पे र खल्तीको एकीकृत सेवा सुरु

बिजनेस पोष्ट

७ महिना अगाडि

काठमाण्डौ १ साउन २०८२

नेपालको डिजिटल भुक्तानी क्षेत्रमा आज एक ऐतिहासिक कदम चालिएको छ। देशका दुई अग्रणी डिजिटल वालेट कम्पनीहरू, आईएमई पे र खल्ती, मर्जर भएर ‘खल्ती बाइ आईएमई’ नाममा एकीकृत कारोबार सुरु भएको छ। यो मर्जरले नेपालको डिजिटल अर्थतन्त्रमा नयाँ आयाम थप्ने अपेक्षा गरिएको छ।

नयाँ कम्पनी आईएमई खल्ती लिमिटेड को चुक्ता पुँजी ५४ करोड रुपैयाँभन्दा बढी रहेको छ, जसले यसलाई नेपालको सबैभन्दा ठूलो डिजिटल वालेट बनाएको छ। यो मर्जरसँगै साविकका १ करोड २७ लाख सेवाग्राहीहरू एकीकृत प्लेटफर्ममा जोडिएका छन्, जसले डिजिटल भुक्तानीलाई थप सहज र सुलभ बनाउने विश्वास कम्पनीले लिएको छ।

आईएमई पे र खल्तीले विगत एक दशकदेखि डिजिटल भुक्तानी सेवाहरू प्रदान गर्दै आएका थिए। आईएमई पे ब्याज प्रदान गर्ने एकमात्र वालेटको रूपमा परिचित थियो र रेमिटेन्स, इनड्राइभ भुक्तानीजस्ता सेवाहरूमा लोकप्रिय थियो। त्यस्तै, खल्ती मुभी बुकिङ, इभेन्ट टिकटिङ र आफ्ना नवीन फिचरहरूका कारण विशेषगरी युवापुस्तामाझ रुचाइएको थियो।

यो मर्जरले दुवै कम्पनीका उत्कृष्ट सेवाहरूलाई एकीकृत गरी परिष्कृत, सहज, सरल र सुरक्षित रूपमा प्रदान गर्ने लक्ष्य राखेको छ। नयाँ प्लेटफर्मले रेमिटेन्स, बिल भुक्तानी, टिकट बुकिङ, र अन्य डिजिटल सेवाहरूलाई एकै ठाउँमा समेट्ने छ।

साविकका आईएमई पे प्रयोगकर्ताहरूले ‘खल्ती बाइ आईएमई’ एपमा सहजै माइग्रेट गर्न सक्नेछन्। यो प्रक्रियामार्फत आईएमई पे वालेटमा रहेको रकम, ब्याज, रिवार्ड प्वाइन्ट र सम्पूर्ण विवरणहरू नयाँ एपमा स्थानान्तरण हुनेछन्। खल्ती प्रयोगकर्ताहरूले भने आफ्नो एप अपडेट गरी नयाँ फिचरहरूको अनुभव लिन सक्नेछन्। मर्जरपछिको यो एकीकृत एपले प्रयोगकर्ताहरूलाई एकल प्लेटफर्ममा सबै सेवाहरू प्रदान गर्नेछ।

आईएमई पे आईएमई ग्रुपअन्तर्गत सञ्चालित थियो भने खल्ती चार सह–संस्थापकद्वारा स्थापना भएको कम्पनी हो, जसमा पछि वल्डलिंक र त्रिवेणी ग्रुपजस्ता कर्पोरेट लगानीकर्ताहरू जोडिएका थिए।

आईएमई डिजिटल सोलुसन्सका अध्यक्ष कृष्ण प्रसाद शर्माले यो मर्जरले डिजिटल नेपालको सम्भावनालाई नयाँ उचाइमा पुर्‍याउने विश्वास व्यक्त गरेका छन्। त्यस्तै, खल्तीका अध्यक्ष मनोज कुमार अग्रवालले यो मर्जरलाई नेपाली डिजिटल वित्तीय क्षेत्रको दीर्घकालीन समृद्धिका लागि ऐतिहासिक कदम भएको बताए। आईएमई खल्ती लिमिटेडका प्रमुख कार्यकारी अधिकृत विनय खड्काले डिजिटल पहुँच विस्तार, डिजिटल साक्षरता र समावेशीकरणका लागि थप योजनाहरू अघि बढाइने जानकारी दिए।

भविष्यका योजना र प्रभाव

यो मर्जरले नेपालको डिजिटल भुक्तानी बजारमा ई–सेवाको वर्चस्वलाई चुनौती दिने अपेक्षा गरिएको छ। नयाँ कम्पनीले ग्रामीण क्षेत्रमा डिजिटल भुक्तानीको पहुँच विस्तार, नवीन सेवाहरूको विकास र प्रतिस्पर्धी शुल्क संरचनामार्फत प्रयोगकर्ताहरूलाई लाभ पुर्‍याउने योजना बनाएको छ। साथै, नेपाल राष्ट्र बैंकको पेमेंट एण्ड सेटलमेन्ट बाइला, २०७७ को संशोधनले यस्ता मर्जरहरूलाई सहजीकरण गरेको छ, जसले यो मर्जरलाई सम्भव बनाएको हो।